* نظامي الخاص مع الحُبوب و اثارها ..

مرحبآ يا جميلات :$ 

بعد ماشفت اقبال كبير من البنات يسألوني في صفحة الأسك عن الحبوب واثارها قلت بنزله لكم بوست وأتكلم بإسهاب عشان 

تفهموني زين .. 

أنا أول ماتطلعلي حبوب تصيبني تعاسة .. الشكل سيء 

غير كذا احياناً تكون توجع 

وأحيانا تكون ملتهبه ماتتقبل تحطين كريم بوجهك او مكياج او اي شيء ..

أول ماتطلعلي اتبع نظام بسيط عشان اتخلص منها سريع سرريع ..

نظامي هو :

1- انظف وجهي يومياً 3 مرات اقل شيء " هالشيء عندي طبيعي سواء فيه حبوب او لا "

2- اقشرها بالمقشر الخاص للوجة ..

3- اهتم بترطيب وجهي بس بكريمات غير دهنيه !

4- اخفف من الشوكولاتات و الدهون ..

5- اشرب موية كثير ينظف جسمي ومعدتي ..

6- استخدم الكلينكس لتجفيف وجهي أو أخليه يجف من نفسه ..

هذا بشكل عام اللي اتبعه عشان اتخلص من الحبوب ..

نبدأ أول شيء بالكريم المقشر ♥ 

♥ كريم Retin-A 

*واضح من الصورة أنه مستهلك كثير ههههه* 

الرتن أي كريم مقشر "قوي" وحطوا خطين تحت قوي , 

يعني ماتستعملوه بدون استشارة طبيب لتقشير الجلد , ولا تستعملوه للمناطق الاخرى ابداً ابدا ..

يُستخدم بحذر شديد ..

قبل موعد نومي بنص ساعة آحط بـ اعواد الاذن .. كل حبه اطبطب عليها بالكريم بدون ما ألمس جلدي المتعافي ..

بعدها اخليه لما يجفّ واحط راسي وأنام ..

مايبهدل لأنك بتحطين كمية قليلة على كل حبة بس ويجف بسرعه ..

صحيت اليوم الثاني .. أغسل وجهي بـ 

♥ صابون Pyary الكُركمْ ..

هذي الصابونة ما أستخدمها الا اذا طلعت الحبوب لأني اساساً استعمل لتنظيف وجهي غسولات مو صوابين ,

الصابونة حلوة للحبوب لأنها تجفف الحبّة وتصفي الوجة ..

اغسل وجهي بها لما اصحى .. 

استخدمها 3-4 مرات باليوم لأنها تنظف من قلب وتشيل الدهون والافرازات اللي بالوجة عشان ماتسبب حبوب ...

بعدها أقشّر بمقشري المفضل 

♥ Stives للتحكم بالبثور ..

هالمُقشر اشهر من نار على علم , وأكيد كلكم جربتوه ..

خفيف ومع ذلك ينظف ويقشر بشكل ممتاز , 

استخدم هالنوع المخصص للبشرة الدهنية وقت ماتطلع الحبوب ؛ لأن بشرتي وقتها الله وكيلكم تصير شبه دهنيه 

تفرز دهون وتتلامع ..

فَ اخذ كمية بسيطة وافرك وجهي بشكل خفيف عشان مااجرح وجهي .. بعدها اغسله بموية باردة 

و أرش موية ورد اخليها لما تجف عشان تتقفل المسام ..

استعمله كل 3 ايام مرة وحدة بس ..

مع التقشير والجفاف اللي يتسبب به تقشير الحبوب .. ايش اسوي لما احط ميك أب ؟

التقشير والقشور تخلي الميك أب فاشل لو أيش تحطين , عشان كذا اقولكم ابتعدوا عن الميك اب هالفترة 

ريحوا بشرتكم ..

لكن لو كنتي مضطرة لمناسبة .. هنا لازم تهيئين بشرتك بشكل مضاعف عن الطبيعي عشان تعطيك بشرة ملساء نظيفة وبلا قشور ..

أول شي حطي واقي الشمس عشان تحمي الحبوب لا تتلوث من المكياج والجوّ ..

حطيه وخليه 5-7 دقايق 

الخطوة الثانية البيس الخاص لمكياجك .. 

خليه كم دقيقة بعدها حطي الميك اب وان شاء الله ماراح يبان التقشير .. 

طيّب و آثار الحبوب .. ايش الحل معها ؟

الاثار يبيلها بال طويييل .. مستحيل اي منتج يعطيك نتيجة سحرية من اول مرة ,

طولي بالك ..

- قشري بشرتك بشكل يومي بمقشر يومي خفيف ..

- رطبي بكريم طبي خالي من العطور اللي تسبب التبقع ..

- استخدمي كريم مفتّح .. 

شخصياً أستخدم هذا الكريم وقت النوم وفي الظلام ؛ لأن في النور بيعطيك نتائج عكسية ..

اسمه : الدوكين فورت 4%  ♥ 

مع الاستخدام المستمر ينور الوجة ويشيل التبقع والآثار ..

بكذا اكون خلصت البوست ..

اتمنى أني افدتكم وكان أسلوبي واضح وسلس ♥♥